Falece un motorista tras unha saída da vía en Carnota

Un motorista faleceu tras sufrir unha saída da vía á altura do quilómetro 87 da AC-400, en Santa Comba, Carnota.

Pasadas as 21:40 horas do sábado, un particular informou o 112 Galicia de que acababa de atopar unha moto accidentada fóra da estrada. O implicado estaba a carón do vehículo e precisaba asistencia sanitaria urxente.

De inmediato, desde o Centro Integrado de Atención ás Emerxencias solicitouse a acción de Urxencias Sanitarias de Galicia-061, da Garda Civil de Tráfico e do GES de Muros.

Unha vez no lugar, os profesionais sanitarios só puideron confirmar o falecemento do home duns 40 anos.