Activo un incendio en Quiroga que queimou xa máis de 20 hectáreas

 Un incendio que empezou pouco antes das 15.30 horas deste martes na montaña de Quiroga supera xa, segundo as estimacións provisionais, as 20 hectáreas calcinadas, segundo confirmaron a Europa Press fontes da Consellería do Medio Rural.

O departamento autonómico traslada que os equipos están a traballar para combater as chamas e apuntan á dificultade engadida dos continuos cambios de vento que se dan na zona.

🔥 QUIROGA
Activo un incendio que queimou xa máis de 20 hectáreas pic.twitter.com/l27E5sxjCc

— G24 (@G24Noticias) September 15, 2026

O incendio empezou na parroquia de Pacios da Serra, nunha zona con monte baixo e amplas masas de piñeiral. O concelleiro responsable da área de Medio Rural en Quiroga, Luis Manuel Arias, indicou tamén a Europa Press que o vento é un factor que está a dificultar a extinción.

"O lume empezou na montaña arriba, nun cume, e houbo momentos nos que parecía achicado e que se ía a dar apagado, pero finalmente non", lamentou, e indicou que, a pesar de que as chamas descenderon, por agora non hai núcleos de poboación en risco.

Desde a Consellería, pola súa banda, trasladaron que os efectivos seguen traballando e mantense contacto co rexedor, José Luis Rivera.

Para a súa extinción ao longo do día mobilizáronse tres técnicos, 12 axentes, 16 brigadas, 15 motobombas, catro pas, dúas unidades técnicas de apoio, sete helicópteros e nove avións.

ACTIVO un incendio forestal no concello lucense de Quiroga, parroquia de Pacios da Serra, que segundo as últimas estimacions provisionais supera as 20 hectáreas. #IFPaciosdaSerraQuiroga

— incendios 085 (@incendios085) September 15, 2026