Publicador de contidos

Publicador de contidos

Bruxelas fai soar as alarmas polo declive dos insectos polinizadores

Bruxelas fai soar as alarmas polo declive dos insectos polinizadores

"Estes pequenos insectos poden definir o futuro da natureza e a seguridade alimentaria", di o comisario europeo de Medio, Virginijus Sinkevicius

EFE 24/01/2023 14:22

A Comisión Europea presentou este martes unha serie de recomendacións aos países da Unión Europea para frear en 2030 o declive dos insectos polinizadores ante o descenso das poboacións de abellas, bolboretas ou avespas, que supón unha ameaza para a biodiversidade e a agricultura na UE.

"As pequenas cousas poden operar grandes cambios no mundo. No caso dos polinizadores, estes pequenos insectos poden definir o futuro da natureza e a seguridade alimentaria a longo prazo", declarou en rolda de prensa o comisario europeo de Medio, Virginijus Sinkevicius.

O Executivo comunitario trasladou aos estados membros da UE un documento cunha serie de recomendacións para "mellorar a conservación e aplacar as causas do declive" que reforza unha primeira comunicación emitida en maio de 2021, despois de que o Tribunal de Contas da UE subliñase en 2020 que as accións comunitarias para protexer a estes insectos resultaran ineficaces.

En concreto, Bruxelas propón varias liñas de acción centradas nos polinizadores silvestres, e en especial nas 2.000 especies de abellas censadas na UE. Estas pasan por conservar mellor ás especies e os seus hábitats, restaurar as súas contornas de vida nas paisaxes agrícolas ou mitigar o impacto do uso de pesticidas.

"A metade dos cultivos da UE que dependen dos polinizadores sofre un déficit. Reducir e substituír os pesticidas químicos é absolutamente necesario", sinalou o vicepresidente da Comisión Europea para o Pacto Verde, Frans Timmermans.

A Comisión Europea, que asegura que a UE xa ten "un dos sistemas de regulación máis estritos do mundo relativo á aprobación de pesticidas", estima que a achega dos polinizadores á reprodución de cultivos e plantas silvestres ten un impacto de "polo menos 5.000 millóns de euros ao ano" no sector agrícola comunitario, polo que o seu declive supón "un risco directo para a produtividade agrícola", sinalou nun comunicado o comisario de Agricultura, Janusz Woijciechowski.

"Onde se detecten impactos daniños para os polinizadores, tomaranse medidas legais para restrinxir ou prohibir o uso dos pesticidas concernidos", asegura o Executivo comunitario.

Bruxelas, que xa aborda o problema a través de distintas ferramentas, algunhas xa en uso como as Directivas de Hábitats e Paxaros, a Política Agrícola Común (PAC) ou as políticas de cohesión, investigación e innovación, quere reforzar ese traballo.

A Comisión anima os Vinte e sete a que melloren os hábitats dos polinizadores en áreas urbanas e a que os gorezan de ameazas como o cambio climático, as especies invasoras ou a polución lumínica.

Bruxelas tamén pide ás capitais que traballen para aumentar a concienciación pública e proponse ademais mellorar o coñecemento sobre os problemas que xeran o declive deses insectos, como a creación para 2025 dun mapa de áreas de polinización na UE.

A Comisión Europea avanzou que máis adiante presentará outro paquete de recomendacións sobre polinización especificamente dirixidas á agricultura, atendendo á iniciativa cidadá "Salvar as abellas e os granxeiros".

Publicidade
Publicidade
Publicidade
Publicidade
Pódeche interesar

Publicador de contidos