Bos resultados no inicio da campaña do polbo, con 290 toneladas capturadas en menos dun mes

Aínda non hai un mes que abriu a campaña do polbo e xa se comercializaron 290 toneladas nas lonxas galegas. As boas capturas e os prezos nótanse principalmente nas lonxas de Ribeira, Bueu e Vigo, onde máis capturan. Despois de tres meses parados o sector está vendo os resultados dunha explotación sostible.

No que levamos de xullo a campaña do polbo deixa uns resultados que había tempo que non se vían, duplicaron en moitas confrarías a cantidade de capturas do ano pasado. É o caso de Bueu.

"Este mes estase comportando moi ben, excelentemente ben. Se facemos unha comparativa dos anos 23, 24 e 25 vese. No 2023 vendéronse 19 toneladas, baixou en 2024, a 17 e este ano levamos case 45. Polo tanto a diferencia é abismal", asegura José Manuel Rosas, patrón maior de Bueu.

Tamén en Ribeira capturaron nestas últimas semanas 75 toneladas e en Vigo 26. A cantidade non fixo minguar os prezos, porque a calidade, din os mariñeiros, é boa.  

"O prezo medio no ano 2023 estivo nos 11 euros, baixou a 10 e algo en 2024, e a 12,60 euros o prezo medio deste ano. Mellorou en todos os aspectos", detalla Rosas.

No mes de abril a parada biolóxica prohibiu a pesca do polbo e xunto coa veda de maio e xuño protexeuse a época de reprodución. As confrarías aseguran que se pode comprobar o resultado dunha explotación sostible.

"As evidencias non se negan. É claro e evidente que a recuperación foi bestial. Hai que ser prudentes. Ao inicio da campaña había moito polbo grande, de máis de dous quilos. Isto faille coller a todo o mundo a cota e como se mantivo todo o mes os quilos foron lineais." di o patrón maior de Bueu

A campaña é longa e hai que ver como se comporta o recurso, pero as espectativas do sector son boas tamén para o que queda, que será ata abril ou maio segundo se volva regular a explotación.