Bimba y Lola incrementa as vendas un 7 % e ten abertas xa 311 tendas en todo o mundo

A firma téxtil Bimba y Lola incrementou as súas vendas un 7 % no primeiro semestre do seu exercicio 2025, en comparación co mesmo período de 2024, segundo informa a empresa nun comunicado.

Así, a evolución foi "positiva" tanto en España como no resto de países, representando o negocio internacional o 44 % das vendas totais da compañía.

Desta maneira, a rede de tendas creceu un 5,4 % nos últimos 12 meses, ata os 311 puntos de venda en 32 países de Europa, América e Asia, subindo a facturación das mesmas un 6 %.

Pola súa banda, a canle dixital rexistrou un incremento do 12 %, achegando o 20 % do total de ingresos do grupo. Ademais, a tenda en liña de Bimba y Lola pasou a converterse nunha web global, polo que está dispoñible xa en "practicamente todos os países do mundo", onde é posible comprar as coleccións da marca directamente a través de bimbaylola.com.

Bimba y Lola celebra este 2025 o seu vixésimo aniversario "unida á arte", xa que foi a marca elixida pola National Gallery de Londres para a conmemoración do seu Bicentenario. Ademais, este segundo semestre do exercicio comezouno apoiando a exposición retrospectiva de Maruja Mallo no Museo Reina Sofía.