Baixada das vendas nos postos dos comerciantes instalados no recinto feiral de Lugo
Os vendedores achácano á calor, que leva a un maior gasto na hostalería ou nas atraccións
Cadaquén fala da feira segundo lle vai nela, e semella que este ano é aos comerciantes do recinto feiral de Lugo a quen non lles acaban de saír as contas.
Malia a afluencia masiva de visitantes, quéixanse de que as vendas están a ser moito máis baixas ca outros anos, polo que apenas lles dá para pagar os permisos, que nalgúns casos mesmo superan os mil euros.
Jhon Cando, comerciante: "Non están gastando moito, e o posto foi moi caro. Nestes días non sei se poderemos recuperar os 1.200 euros que nos custou".
Ismael Demba, comerciante: "O ano pasado foi mellor, e este ano está a ser moi frouxo. Xente hai, pero non compra".
Vanessa Aular, comerciante: "No meu posto véndese o normal, pero no resto están vendendo un pouco menos. Cónstame que non están vendendo moito".
Para moitos dos vendedores, este descenso dos seus ingresos ten a súa explicación no tempo que vai. Sinalan que a intensa vaga de calor fai que se incremente o gasto na hostalería ou nas atraccións instaladas no propio recinto feiral do San Froilán, en detrimento dos seus postos.
Jhon Cando, comerciante: "A xente vai ás atraccións, e na comida non che doe gastar. Aquí pides cinco euros por unha pulseira e xa se botan para atrás".
Ramón Laia, artesán: "Este ano vai tanta calor, todos os días, que no meu caso, que vendo calzado de inverno, as vendas un pouco máis baixas que o ano pasado".
Jonathan Tejeda, churreiro: "Vai moita calor, e á xente non lle apetece comer churros ata que pasa o bochorno. A última hora da tarde é cando se empeza xa a vender".
Con todo, queda unha semana de feira por diante, en que os vendedores instalados no recinto aínda poden facer caixa.
