Axudan a desaloxar a vivenda que lle ocuparan ilegalmente a un veciño toxicómano

Os veciños dun edificio do barrio de Lavadores, en Vigo, están desesperados porque dende finais de xullo un veciño drogo dependente ten a casa ocupada ilegalmente. Foron meses de non durmir aturando vendas de droga, lixo, discusións e mesmo un incendio.

A pinga que colmou o vaso foi cando lles engancharon a caldeira da auga quente. Os veciños cambiaron entón as fechaduras e obrigaron os ocupantes ilegais a retirar as súas pertenzas en presenza da policía.

Malia todo, salientar a axuda que prestaron ao veciño toxicómano xestionando a entrada da nai nunha residencia, axudándoo a desocupar a vivenda e coidando del. Mesmo o axudaron a recompilar no portal as pertenzas que quedaban para que as recollan en presenza da policía.

Oito meses sen durmir e con medo noite e día. Familias con menores ou anciáns que viven no edificio tiveron que aturar que ás doce da mañá lanzaran a droga pola ventá aos clientes, un ir e vir constante de delincuentes, venda de droga no portal e no ascensor da vivenda e múltiples pelexas e gritos durante toda a noite.

Comezaron a chegar no verán, e no mes de outubro xa estaban todos instalados na casa do veciño. Eran nove persoas, tres deles nenos. Dous dos ocupantes ilegais xa foron detidos por vender droga no portal.

A preocupación pola seguridade da zona é crecente, e os veciños xa organizaron para este venres unha concentración en protesta polo aumento da delincuencia na contorna desta rúa Ramón Nieto.