Aviso vermello por chuvias torrenciais en Valencia e Almería
As chuvias chegaron case aos 150 litros por metro cadrado nalgunhas comarcas de Valencia
A borrasca Emilia afástase das Canarias e avanza cara a Cataluña
Ata as seis da madrugada está activo no litoral da provincia de Valencia o aviso vermello da Axencia Estatal de Meteoroloxía e o laranxa no resto. As acumulacións de auga superaron os 146 litros por metro cadrado na comarca da Safor.
Estiveron suspendidas as actividades culturais e deportivas e os bombeiros de Castelló tiveron que rescatar unha parella do seu vehículo pola gran cantidade de auga acumulada na estrada.
"Seguimos mantendo as mesmas recomendacións desta mañá: que non atravesen zonas inundables, que se manteñan afastados de canles e barrancos por se hai acumulación de chuvias en calquera momento e que sempre estean atentos á información dos servizos de emerxencia", explicou o conselleiro valenciano de Emerxencias e Interior, Juan Carlos Valderrama.
As comarcas almerienses do Valle de Almanzora e Los Vélez están tamén en aviso vermello polas chuvias ata a medianoite.
A acumulación de auga durante a tarde e algúns desprendementos condicionaron a circulación en varias estradas do norte da provincia. A mobilidade da cidadanía reduciuse de xeito importante nas zonas máis afectadas.
Onde xa se deu por finalizado o aviso foi nas Canarias. O paso da borrasca Emilia deixou máis de 500 incidencias por mor do vento e a chuvia, fundamentalmente o sábado, pero non se rexistraron danos persoais.
