Atracan cunha pistola unha sucursal bancaria na Laracha
Atracan cunha pistola unha sucursal bancaria na Laracha
Foi a plena luz do día en Paiosaco, no concello da Laracha
O home fuxiu coa súa cómplice nun coche vermello e levaron un botín duns 3.000 euros
Pistola en man e a plena luz do día, así foi o atraco da sucursal de Abanca en Paiosaco, no concello coruñés da Laracha. A Garda Civil busca o asaltante, que fuxiu coa súa cómplice nun vehículo de cor vermella.
Todo transcorría con normalidade no comezo de semana na oficina do banco, ata que, contra a unha e media do mediodía, de súpeto entra un home na sucursal esixindo todo o diñeiro a punta de pistola.
Comentan os veciños da zona que no momento do roubo había dous traballadores dentro, e explica Lolo Angeriz, comerciante e veciños da localidade, que o atracador estaba moi nervioso.
Precisamente Lolo foi testemuña da fuxida a pé do atracador. Amais viu como a súa cómplice cruzou a Praza do Campo da Feira co coche, na que non poden circular vehículos, para collelo a pouco máis de 100 metros do banco.
En cuestión de minutos levaron uns 3.000 euros e fuxiron co botín sen deixar polo de agora ningunha pista máis. Foron moitos os veciños, incluso comerciantes ao carón do banco, que nin se decataran do sucedido ata que chegou a Garda Civil.
Segundo as testemuñas, o atracador vestía camisa a raias, vaqueiros, gorra e levaba a máscara posta. O coche co que fuxiron era de cor vermella. A Garda Civil segue a investigar os feitos.
