Aterrorizados en Tui por unha manda de cans moi agresivos

Os veciños da parroquia tudense de Randufe están aterrorizados por unha manda de cans, polo menos oito, que traban nos veciños e nos animais.

Son extremadamente agresivos, tanto que os veciños baixan o lixo con paus para protexérense. O último intento de agresión foi este mércores cando unha veciña foi cercada contra un muro por media ducia de animais e tivo que ser auxiliada para fuxir.

Carmen Domínguez Bugallo ten fotos e vídeos das lesións que sufriu hai catro anos polas trabadas do can do seu veciño. As lesións aínda permanecen agora e tivo que recibir atención médica no hospital.

A última vítima foi María Xosé este mércores, quen conseguiu repeler o ataque, pero sufriu un episodio de ansiedade. Puxo este venres a denuncia na Garda Civil.

A Casiano e á súa muller matáronlles dúas ovellas. Ás once da mañá deste mércores puxeron a denuncia na Garda Civil.