Ataca un grupo de mozos con gas pementa en Ribeira desquiciado polos ruídos da movida
Un dos mozos acabaou detido por pegarlle a un policía cando quixo golpear ao home que os atacara
O veciño, de algo máis de 60 anos, xa ameazara á mocidade noutras ocasións con diferentes armas
Vive na rúa da movida, onde se concentran a maioría de locais de ocio nocturno. Esta fin de semana, contra as catro da mañá, xusto cando pechan os locais e coa xente na rúa, perdeu a paciencia.
"Un cristo aí enfronte cando saíu a xente do bar. Só por estar sentado diante da súa porta ou cousas así".
"É un señor que non leva ben o ruído que se fai á beira da súa casa e saíu chamarlles a atención", explican hostaleiros que pechaban a esa hora.
Chamoulles a atención pero de que maneira! Ameazounos cun coitelo e botoulles gas pementa na cara. Eran unha ducia de mozos e mozas, coa maioría de idade acabada de cumprir, de Ribeira e de Porto do Son. Algúns acabaron en Urxencias.
"Os mozos tiñan a cara toda irritada e foron para a clínica e, aparte do esprai pementa, levaban unhas manchas brancas que non sei se era po ou algo que lles botou a maiores", confirma unha testemuña.
Tamén o home, que pasa dos 60 anos, precisou asistencia sanitaria, polo que coincidiron no PAC e se volveu a liar. Un dos mozos foise contra o veciño que atacara os amigos, pero, froito da carraxe, golpeou o policía nacional que quixo frealo. Deulle de cheo e, de feito, o axente está de baixa.
O mozo foi detido por agresión á autoridade. O home que os atacou por ameazas graves. Non é a primeira vez que provoca unha agresión similar.
"Xa o detiveron aí atrás por saír cunha pistola e tiña un arsenal de armas na casa. Despois saía cos coitelos, agora co gas pementa"
"Anteriormente, saíra cunha pistola ameazando á xente que estaba na rúa, outras veces cun puño americano, cun machete", lamentan hostaleiros da zona.
Certo que na zona, sobre todo na rúa onde se concentran a maioría dos locais, están fartos. Son moitos anos e non hai máis desgrazas porque non lle cadra.
"Había un grupo de rapaces duns vinte anos. Estaban aí falando e, de repente, un deles pegoulle tres patadas á porta, así sen máis. Entón a min cruzóuseme un cable, collín un bate e saín tras eles".
"A xente está moi queimada", recoñecen os veciños.
Os dous detidos están en liberdade, á espera de xuízo. O mozo amosouse arrepentido pero o outro home non descarta repetir.
