As reservas turísticas non paran de medrar na Veiga por mor da eclipse total de agosto

Destino Starlight, teito de Galicia, o municipio da Veiga prepárase para un dos acontecementos astronómicos máis relevantes do último século. Este será un deses lugares privilexiados para ver a eclipse total do 12 de agosto.

"Practicamente está todo cheo, pero, ben, pode haber algunha cancelación de última hora e pode a xente intentalo. Agora todo o mundo te chama: cando vai ser?, como vai ser?, porque é certo que A Veiga nos últimos anos consolidouse como o referente de Galicia de astroturismo, e por eso conleva que evidentemente un feito histórico como a eclipse, pois que todo o mundo nos estea chamando para preguntarnos que vai haber e que non vai haber", dí Juan Anta, alcalde da Veiga.

As primeiras chamadas empezaron xa hai meses.

"Temos reservas dende o verán pasado, xente de Galicia, de toda España, ata temos reservas de Alemaña e de Holanda. Agora mesmo temos todas as habitacións dobres ocupadas, temos prazas de liteiras libres; que chamen o antes posible porque, claro, esto cada día vai a menos." apunta Ana Isabel Álvarez, encargada do albergue Montañas de Trevinca da Veiga.

Tamén na Veiga, a 1.300 metros de altitude, está o observatorio astronómico Trevinca. Ademais deste centro, os miradoiros para observación celeste que hai no concello son ideais para ver a eclipse.

"No campo, ao aire libre, é un fenómeno totalmente sobrecolledor, é antinatural. É como se fai de noite practicamente nun segundo, case de noite, empézanse a ver as estrelas e xusto onde está o sol aparece unha especie de pantasma que é a coroa solar co centro perfecto negro que é a Lúa. É tremendamente espectacular." explica Borja Tosar, astrofísico no Centro Astronómico da Veiga.

Recomendan non deixar o aloxamento para o último día e prepararse para un evento astronómico excepcional.