As probas de acceso á universidade arrancan este martes cunha cifra récord de inscritos en Galicia

Galicia afrontará a partir deste martes unha nova edición das Probas de Acceso á Universidade (PAU) cunha cifra récord de inscritos, case 13.500, e medidas de control máis rigorosas para garantir a transparencia das probas.

En total son 13.441 os estudantes matriculados que realizarán os exames, o que supón 495 máis que na convocatoria do ano pasado. As probas celebraranse durante tres xornadas, do 2 ao 4 de xuño, en ata 36 sedes distribuídas por dez municipios galegos (A Coruña, Ferrol, Lugo, Ourense, Pontevedra, Santiago, Vigo, Cee, Viveiro e A Rúa).

Como principais novidades, destacan que este ano a supervisión será máis exhaustiva, especialmente no referente ao material que os aspirantes poderán utilizar durante os exames, co obxectivo de evitar fraudes.

Para reforzar a seguridade do proceso, a Comisión Interuniversitaria de Galicia (CIUG) incorporou un apéndice ao protocolo vixente que amplía as competencias do profesorado encargado da vixilancia. Así, os membros das comisións delegadas poderán revisar obxectos privados como calculadoras, lentes ou bolígrafos; mentres que a posesión de dispositivos electrónicos non autorizados implicará a expulsión inmediata do exame.

Por provincias, A Coruña concentra a maior porcentaxe de estudantes rexistrados, cun 46,76% do total. Séguelle Pontevedra, que reúne o 33,63% dos aspirantes; mentres Lugo e Ourense representan o 10,14% e o 9,47%, respectivamente. Por cidades, con todo, Vigo encabeza a lista con 3.026 estudantes rexistrados, seguida pola Coruña, con 2.855, e Santiago de Compostela, que suma 2.472.

A PAU 2026 arrancará ás 09.00 horas coa presentación oficial das probas. Unha hora máis tarde comezará o primeiro exame común, que será o de Lingua Castelá e Literatura. Posteriormente, ás 12.00 horas, os estudantes examinaranse de Historia de España ou Historia da Filosofía.

A sesión de tarde iniciarase ás 16.00 horas coas probas de Xeoloxía e Ciencias Ambientais, Matemáticas Aplicadas ás Ciencias Sociais II, Técnicas de Expresión Gráfico-Plástica e Movementos Culturais e Artísticos. Ás 18.00 horas será a quenda de Debuxo Técnico II, Segunda Lingua Estranxeira e Historia da Música e da Danza.

A convocatoria deste ano mantén unha característica xa introducida na edición anterior; e é que todos os estudantes deberán acudir ás probas durante os tres días programados; xa que o exame de Lingua Galega e Literatura, que é obrigatorio, celebrarase na mañá do xoves, última xornada da PAU.