Pontón propón un programa de bolsas de alugueiro para universitarios
Defendeu tamén a construción dunha residencia universitaria pública en cada un dos campus galegos
A portavoz nacional do BNG reclamou este mércores que a Xunta e as universidades galegas poñan en marcha unha bolsa de alugueiro para estudantes universitarios que lles permita acceder a vivendas "en condicións dignas" e evite que o custo da vivenda se converta nun obstáculo para estudar.
“É evidente que hai problema gravísimo de acceso á vivenda, que os alugueiros están disparados e moito máis para os estudantes universitarios, que teñen que sumar moitos gastos extras ao que significan os seus estudos, e o que non pode ser é que precisamente o alugueiro convértase nun elemento que impida desenvolver a túa carreira universitaria”, dixo en Vigo Pontón, onde se reuniu coa reitora, Carmen García Mateo.
Como primeira medida, a dirixente nacionalista expuxo que Xunta e universidades colaboren para crear unha bolsa de alugueiro dirixida a estudantes, unha iniciativa que, segundo defendeu, permitiría facilitar o acceso a vivendas con prezos e condicións adecuados e para a que “o único que se necesita é vontade política", asegurou.
Pontón vinculou esta proposta coa necesidade de ampliar tamén a oferta pública de aloxamento universitario. Neste sentido, defendeu a construción dunha residencia universitaria pública en cada un dos campus galegos.
Segundo os datos achegados pola portavoz do BNG, o sistema universitario galego conta con ao redor de 64.000 estudantes e unhas 2.000 prazas de residencia, o que supón aproximadamente unha praza por cada 45 estudantes.
A dirixente nacionalista asegurou que nos últimos anos non se incrementou "nin unha soa praza pública" nas residencias das universidades galegas, mentres que si aumentaron as prazas privadas.
