Vox vaise querelar contra o delegado do Goberno polas protestas contra o seu acto en Ferrol

Vox anunciou este luns a presentación dunha querela contra o delegado do Goberno en Galicia, Pedro Blanco, ao considerar que evitou "protexer" o seu acto de precampaña celebrado este pasado sábado en Ferrol, sobre o que sinalou que sufriu un "boicot de Galiza Nova", organización xuvenil do BNG.

Nun comunicado, a formación manifestou que a falta de actuación das delegacións do Goberno ante o acoso aos actos de Vox repítese da Coruña a Mahón, Avilés ou Zamora e sinalou que ante iso esta nova querela foi tramitada ante os xulgados de Ferrol.

Ademais, avanzou Vox que cita os responsables da Delegación e a Subdelegación do Goberno na Coruña por non garantir o acto ao que acudiu o xefe da súa delegación no Parlamento Europeo, Jorge Buxadé.

Sobre o particular, Vox indica que comunicou o evento "en tempo e forma" e que pediu "expresamente" a protección das Forzas e Corpos de Seguridade do Estado, que estableceron un cordón de separación entre o seu posto informativo e unha protesta antifascista convocada no mesmo lugar, o céntrico Cantón de Molíns.

"Un día antes, Galiza Nova e outros colectivos convocaron unha concentración co obxectivo declarado de frealo, a Delegación sabíao e coñecía o ocorrido días antes na Coruña; aínda así, non prohibiu a contramanifestación nin cambiou o seu lugar ou horario", afeou o grupo político.

Criticou Vox, nesa liña, que non se "garantiu que o acto se desenvolvese con normalidade" e que non se trata dun "caso illado, senón que a mesma falta de actuación repetiuse na Coruña, Mahón, Avilés ou Zamora, onde delegacións do Goberno que coñecen o risco están a permitir a protesta xunto ao acto de Vox".

Deste xeito, a formación considerou que o Executivo central "non adopta medidas eficaces para protexer un acto electoral" e avanzou que coa súa querela imputa ao delegado en Galicia, Pedro Blanco, "un delito contra os dereitos cívicos, en comisión por omisión, e un de prevaricación administrativa".

Sobre os impulsores da concentración antifascista, apoiada por diferentes colectivos a través de redes sociais, atribuíulles un delito de odio e un contra o dereito de reunión, amais das "lesións e danos que resulten", aínda que a mobilización concluíu sen incidentes.