Medra o número de visitantes nas vésperas do Apóstolo pero non as pernoctacións

Na Oficina do Peregrino aprecian estes días unha grande afluencia de camiñantes pero aínda prevén incrementar máis a expedición de Compostelas a semana que vén, con motivo da festividade do Apóstolo.

"Onte xa tivemos preto de 2.500 peregrinos e a semana que vén poderiamos chegar aos tres mil ou aos tres mil e pico", avanza César Rúa, da Oficina do Peregrino. 

Na Asociación de Turismo e Hostalería Compostela aseguran, porén, que o aumento de visitantes non se reflicte nas pernoctacións.

"O ano pasado por estas datas tiñamos unha ocupación do 85 ou o 86% e este ano non subimos dun 65%, facendo un baremo de todos os hoteis", afirma Sara Santos, membro da directiva da Asociación de Turismo e Hostalería Compostela.

Na asociación admiten que vén moita xente, moitos grupos, pero explican que o fan en excursións dun día e que non quedan a durmir.

"Os prezos subiron, subiu todo, pero outro factor moi importante son as conexións aeroportuarias. Non hai avións. Hai moi malas conexións", mantén a directiva da asociación Sara Santos.

No verán, ao contrario que no resto do ano, Santiago recibe máis nacionais que estranxeiros. Os españois representan nestas datas entre un 60 e un 65% dos peregrinos. Unha porcentaxe na que non abundan os galegos.

"Nos anos santos é cando máis galegos hai pero os outros anos adoitan vir poucos. Este ano, por exemplo, non levamos nin o 4% de galegos. Como se di, na casa do ferreiro, coitelo de pau", precisa desde a Oficina do Peregrino César Rúa.