Marcos Gómez: "O vento sopra a favor deste Xacobeo, hai que tentar que chegue a todas as partes"
O comisario do Xacobeo 2027 aposta por desestacionalizar esta cita e facer que a programación chegue a todos os concellos galegos
Comeza a conta atrás cara ao Xacobeo 2027, co que se pretende superar o éxito dos anteriores Anos Santos, marcados pola crise económica e a pandemia da COVID-19.
O camiño de Santiago consolídase como un dos grandes atractivos turísticos, especialmente para os visitantes estranxeiros, que son xa 7 de cada 10 persoas que percorren esta ruta.
Nunha entrevista no Bos días, o comisario do Xacobeo 2027 Marcos Gómez asegura que será unha oportunidade estupenda para consolidar esta cita, non só entre os visitantes de fóra senón entre todos os galegos e galegas.
"O vento vai a favor deste Xacobeo. Hai que sacar o máximo rendemento e facer un Xacobeo que recordaremos todos", explica. Gómez asegura que están xa traballando para tentar traer algún concerto destacado con motivo do Ano Santo, pero reitera: "Hai que tentar que o Xacobeo chegue a todas as partes e que haxa programación para todos os gustos".
O comisario do Xacobeo estima que serán uns 50 os proxectos que o Xacobeo espalle por todos os concellos galegos. Á volta do verán abrirase o prazo para que as empresas presenten as súas propostas, que poderían chegar a 100 en 2027.
Marcos Gómez explica que para moitos municipios do interior, o Camiño de Santiago é un ingreso fundamental, polo que é preciso tentar desestacionalizalo para poder atraer visitantes durante todo o ano.
