As mascotas son bendecidas con motivo do día de Santo Antón, patrón dos animais

Durante o seu retiro no deserto, Santo Antón conviviu en harmonía coa natureza e cos animais. Cada dezasete de xaneiro, son moitos os fieis católicos que buscan a súa protección na tradicional bendición de mascotas que se realiza en moitas parroquias galegas. A de Conxo fíxoo este ano por primeira vez.

Oliver é a cría máis delicada dunha camada de gatiños rescatada da rúa. "É mudo, non ten voz. Ten problemas respiratorios e estamos tratándoo na casa", explica a muller que o ten en acollida.

Foi un dos animais bendecidos na igrexa de nosa señora da Mercé de Conxo. A parroquia compostelá incorpora a tradición á súa axenda de xaneiro por primeira vez.

"Con moita ilusión porque a natureza e os animais sempre nos falan e nos achegan a Deus". di Tomás García, párroco de Conxo.

Cans, gatos e tamén algún paxaro  achegáronse ao templo buscando o amparo de Santo Antón. Os seus humanos quixeron celebrar así o día do patrón dos animais como expresión de amor, e de agradeCEmento, pero tamén como recordatorio de compromiso e responsabilidade.

Na parroquia carballesa de Noicela recuperaron o ritual da beizón en 2023 e cada ano son máis as veciñas e os veciños que levan os seus animais á misa, lugar inesperado de socialización animal.