Incáutanse en Baraxas de 15 pangolíns mortos nunha maleta procedente de Etiopía

A Garda Civil incautouse no aeroporto Adolfo Suárez Madrid-Baraxas de 15 exemplares mortos dunha subespecie de pangolín que se atopaban no interior dunha maleta procedente dun voo de Addis Abeba (Etiopía).

Segundo informou este xoves a Dirección Xeral da Garda Civil, foron axentes da Unidade de Fiscal e de Fronteiras os que interceptaron estes exemplares mortos e envoltos en plástico nunha maleta. Estes animais están protexidos polo Convenio sobre o Comercio Internacional de Especies Ameazadas de Fauna e Flora Silvestres (CITES)

Foi o pasado 16 de febreiro cando gardas civís atoparon a maleta dunha pasaxeira procedente de Addis Abeba, en cuxo interior a inspección de raios X permitiu detectar diferentes tonalidades e densidades que chamaron a atención dos axentes.

Ao abriren a equipaxe diante da súa propietaria, atoparon os 15 exemplares de pangolín envoltos en plástico, cun peso de 40 quilos. Por iso, investigouse a pasaxeira como presunta autora dun delito contra a fauna e os exemplares foron enviados á autoridade nacional CITES para o seu estudo, catalogación e valoración.

A incautación produciuse no marco das funcións de resgardo fiscal do Estado, desempeñadas pola Garda Civil, cuxo obxecto é previr e perseguir o contrabando, o narcotráfico, a fraude e outras infraccións de carácter fiscal baixo a dependencia funcional da autoridade aduaneira.

O tráfico ilegal de especies protexidas constitúe unha grave ameaza para a biodiversidade e pode estar castigado con penas de prisión e multa, de conformidade co disposto no Código Penal.