As comunidades do PP rexeitan o plan Moves e piden axudas para calquera tecnoloxía

As doce comunidades autónomas gobernadas polo PP, entre elas Galicia, pediron este venres unha liña de axudas á compra de vehículos eficientes de calquera tecnoloxía e rexeitan o novo plan Moves III do Goberno, que concede fondos para a adquisición de coches eléctricos e instalación de puntos de recarga.

Nunha nota do partido, sinalan que trasladaron ao Goberno a súa preocupación polo deseño da nova liña de axudas de mobilidade eléctrica, anunciada polo Ministerio para a Transición Ecolóxica, ao considerar que "persiste nos erros do pasado" e xera "tal inseguridade xurídica" que impide a execución do plan.

A vicesecretaria de Desenvolvemento Sostible, Paloma Martín, di na nota que é necesario un "cambio de modelo" e a apertura dunha liña de axudas para promover a comercialización de vehículos eficientes de calquera tecnoloxía, ampliando o catálogo de solucións para que poidan entrar os biocombustibles e gases renovables.

Reprocha ao Goberno de Pedro Sánchez o intento de "enganar" os cidadáns ao incluír entre os 14.100 millóns anunciados para mitigar os efectos dos aranceis anunciados polo presidente dos Estados Unidos, Donald Trump, os 400 millóns do Plan Moves a fondo perdido xa previstos antes, que atende a solicitudes presentadas desde o 1 de xaneiro deste ano.

O novo esquema do plan, segundo estas comunidades, mantén unha tramitación "excesivamente complexa", carece de axudas directas na compra de vehículos eléctricos e non incorpora avances na xestión administrativa. Insisten, como xa fixeron hai dous días, en solicitar ao Goberno a posta en marcha dun novo programa Moves IV que estableza descontos directos e ao instante nas facturas aos compradores de coches eléctricos ou ao instalar puntos de recarga para eliminar a "excesiva" burocracia.

Piden que o novo programa incorpore reducións do IVE, seguindo o exemplo de países como Noruega, Países Baixos e Alemaña; ou beneficios fiscais como a dedución do 100 % do IVE para empresas que aposten pola electrificación das súas frotas.