Consumo considera especialmente vulnerables os menores pola sobrexposición á Internet

Persoas maiores con poucas ferramentas no mundo dixital, pero tamén menores que sen sabelo, por exemplo, fan compras en videoxogos coas tarxetas prepago do móbil. O algoritmo fainos vulnerables porque coñece perfectamente os nosos gustos e necesidades, e por iso é a propia Unión Europea a que advirte dos riscos para a saúde mental, da adicción ás compras por Internet.

 "A nova estratexia que presentamos inclúe información e formación, para eles e para os seus pais. Temos que saber como é o novo mercado, este novo mundo ao que nos enfrontamos onde a IA pode predicir os teus gustos e ofrecer produtos personalizados para facer que ti te comportes dun determinado xeito", explicou Sol Vázquez, a xerente do Instituto Galego do Consumo e a Competencia.
 

Son algúns dos asuntos que se tratan na xornada de presentación da Nova Estratexia Galega de Protección do Consumidor, que establece o marco para preservar os nosos dereitos nos próximos anos.

"Ten como obxectivo fundamental protexer aos consumidores e usuarios e poñendo o foco nas persoas vulnerables, dicía antes nas persoas maiores e os menores e facer fronte aos riscos do mercado dixital", declarou José González, o Conselleiro de Emprego, Comercio e Emigración.

Lémbranos que ante os produtos de Internet que veñen de terceiros países o consumidor ten os mesmos dereitos, e que son os mesmos os requisitos en calidade e seguridade. A nova estratexia inclúe accións formativas e tamén de fomento do consumo responsable de proximidade nas prazas de abastos e o comercio local.

A Nova Estratexia Galega de Protección do Consumidor establece o marco para preservar os nosos dereitos nos próximos anos