As borrascas enchen Vigo de fochancas
Veciños do Couto San Honorato quéixanse do mal estado dos accesos ás súas casas
A rúa Casal segue pechada logo de que un camión do lixo caera nun buraco no pavimento
A sucesión de borrascas e a forte chuvia están a deixar as rúas de Vigo coma queixos de Gruyère. Están a multiplicarse as fochancas en distintos puntos da cidade, con sucesos coma o de onte, en que un camión do lixo quedou atrapado nunha delas.
O interior da rúa Couto San Honorato, detrás da Cidade da Xustiza, estase a afundir. Os veciños levan anos denunciando as fochancas que case lles impiden o paso ás súas casas, e que tiveron que arranxar facendo apaños eles mesmos. Os días de moita chuvia mesmo teñen que cruzar subindo ao muro das propiedades. Levan presentando reclamacións dende o ano 2023. O acceso ás casas foi especialmente complicado estes días que a chuvia anegou o camiño e o fixo intransitable.
Fochancas tamén sinalizadas en pleno centro de Vigo, como entre as rúas Vázquez Varela e Pizarro que complican a circulación. E susto o que levaron onte os traballadores do servizo do lixo que caeron co seu camión nun buraco na rúa Casal. A Policía Local pechouna tras ceder o asfalto por mor das chuvias e para evitar un colapso total da estrada. Os operarios traballan xa arreo para arranxar a rúa, e que o tráfico permanecerá pechado ata garantir a total seguridade do firme.
