En liberdade os tres detidos en Teo, coa obriga de compareceren no xulgado

Os tres detidos en Teo, acusados de furtos continuados e falsidade documental, nun operativo dirixido pola Sección de Instrución do Tribunal de Instancia número 3 de Santiago, quedaron en liberdade coa obriga de comparecer mensualmente e coa prohibición de saír do territorio nacional. Este mércores, segundo informou o TSXG, pasaron a disposición xudicial tres persoas dos polo menos 11 arrestados por este caso.

Estas mesmas fontes sinalaron que a causa continúa polos presuntos delitos de furtos continuados, falsidade documental e aqueles que puidesen derivarse da instrución da causa, mentres que o procedemento segue declarado secreto. Este luns e este martes a Garda Civil e a Axencia Tributaria practicaron rexistros en, polo menos, unha vivenda do municipio coruñés de Teo. Os arrestados mercaban e vendían coches de importación en dous negocios que tiñan en Padrón.