Os técnicos analizan as causas do desprendemento sobre a autovía en Gondomar
O carril sentido Baiona permanece pechado ante o risco de novos aludes
Os técnicos de infraestruturas analizan sobre o terreo o desprendemento que mantén cortada a autovía do Val Miñor dende a tarde deste martes á altura de Gondomar.
O material desprendido na montaña non chegou a invadir a calzada. Porén os técnicos falan dunha importante inestabilidade na parte superior do noiro.
Xeólogos e técnicos da Axencia Galega de Infraestruturas avalían os danos para tomar medidas urxentes que aseguren a ladeira.
Ante o risco inminente de novos desprendementos sobre a vía, o tramo afectado continuará pechado ao tráfico como medida de de seguridade.
O corte afecta ao carril sentido Baiona. Está habilitado un desvío que canaliza o tráfico cara ao carril contrario, que funciona provisionalmente con dobre sentido de circulación.
