Arrecian as queixas polo mal estado da N-540 que une Lugo con Ourense
Un dos peores tramos é o que vai da cidade ao alto do Picato, son dezaseis quilómetros cheos de fochancas
Nin os máis habilidosos ao volante son capaces de sortear as numerosas fochancas que converten a estrada en intransitable e perigosa
Fochanca tras fochanca, remendo tras remendo. Circular pola N-540 entre Lugo e o alto do Picato é toda unha carreira de obstáculos.
"A estrada está feita un desastre, non amañan as fochancas, todos os días hai accidentes"; di unha muller, e outro home engade: "É totalmente intransitable, os buratos van a máis e o tempo non axuda, está totalmente abandonada".
A vía é intransitable e perigosa. Leva dous anos en obras. Reparan nun lado e estrágase no outro, as zonas que se parchearon recentemente xa están rebentadas.
"Co que choveu, moi mal, porque non ves as fochancas, é un perigo podes ter un accidente, da moita vergoña", di unha muller. Un mozo que leva un camión de repartimento asegura que "a mercadoría pode caer, e é un problema".
A chuvia tampouco axuda, nin os máis habilidosos ao volante conseguen esquivalas fochancas.
"So os esquivas se invades o carril contrario, e é un problema", di un condutor.
Os que a usan a diario deixan alí as rodas e os amortecedores.
"O outro día unha rapaza deixou unha roda, o coche parado no medio da estrada, un perigo", comenta unha veciña.
A vía pide outra reparación urxente.
