Chuvia dez días máis
O dous de febreiro marca tradicionalmente a metade do inverno en Galicia
Caeu auga a chuzos case todo xaneiro, e segue o 2026 chuvioso. Hai que agarrarse aos paraugas porque quedan polo menos outros dez días de borrascas.
"O que está claro que os vindeiros 10 días estaremos co paso de sucesivas borrascas moi preto das nosas latitudes", dixo Alberto Romero, meteorólogo de MeteoGalicia
A partir do mércores empeora no mar. E esta semana volveremos ter avisos por vento e por neve. Baixará ata 900 metros nas zonas altas, Terras de Trives, Viana, Courel, Ancares e tamén interior de Pontevedra. O que non sabemos é se chegará pronto Leonardo, a próxima borrasca con nome.
"De momento non, pero si que é certo que esta semana estaremos co paso sucesivo de frontes asociadas a borrascas que están a profundar", advertiu Alberto Romero, meteorólogo de MeteoGalicia.
A marmota Phill prognostica seis semanas máis de chuvia. Aquí en Galicia, o que vale é o día das vodas dos paxaros, que andan difíciles de ver; pouco se atreveron estes días a asomar a cabeza. O que é seguro é que de frío vento e auga xa fixemos media travesía: medio inverno vai fóra.
