Os veciños afectados polas riadas do Sar en Padrón urxen solucións
Ano tras ano, a auga entra nas casas de Lamas en Estramundi
A veciñanza síntese impotente porque aseguran que as súas reivindicacións non son atendidas
"Todos os anos hai que poñer isto e aínda así o ano pasado entrou!, di unha veciña diante da porta que ten protexida da auga cun taboleiro.
Parece que o peor pasou pero Marga mantén un ollo posto no ceo e outro no río Sar. Con certa resignación relata o vivido na última riada esta semana. Estamos en Lamas, no lugar de Estramundi, en Padrón.
"Pasámolo fatal porque chegou alí e aquí a espera. Estamos pendentes de se sae ou non, porque aquí ninguén se presenta para nada. Todos os anos pasa pero é que non dan solución", relata.
Avanzando só uns metros cara ao río e abren a porta dunha casa onde intentan hoxe volver á normalidade despois da inundación vivida o luns. A impotencia é común na veciñanza que reclama solucións a unha situación que viven todos os invernos. A mesmo sucede en Agronovo e Cambelas.
"O luns sobre todo que pola noite chegou ata aquí a auga. Cando vin pola mañá aínda puiden entrar na casa, pero na de turismo rural estaba inundada", comenta unha muller.
"Normalmente tamén é porque non limpan nin deixan limpar e despois a auga ten que saír por algún lado", di unha veciña.
Ante o temor de que volva chover, os veciños manteñen as barreiras de contención coas que protexen as súas propiedades.
