Arde unha casa en Neda e o lume provoca importantes danos materiais

Un veciño de Neda chamaba o 112 Emerxencias de Galicia pouco antes da nove da mañá deste domingo. Avisaba de que estaba ardendo a casa das súas veciñas, no lugar de Pename, en Santa María de Neda.

Ata o lugar desprazáronse efectivos do GES de Mugardos, axentes da Garda Civil e os Bombeiros do Eume. A vivenda na que prendera o lume é unha casa unifamiliar, de planta baixa.

Estado do interior da vivenda tras o lume. Foto: GES Mugardos

No incendio non houbo que lamentar danos persoais, pero o lume provocou importantes estragos materiais. Aínda que a estrutura da casa non resultou afectada, quedaron calcinados uns 20 metros cadrados, a entrada da casa e tamén un anexo á construción. Arderon portas, o falso teito e tamén unha lavadora entre outros útiles.

De momento descoñécense as causas do incendio, pero sospéitase que se puido deber a un problema eléctrico.

Interior da vivenda de Neda tras o incendio. Foto: GES Mugardos