Apagamento total en Iraq: o goberno di que foi pola caída da subministración de gas e "non pola guerra"

Unha redución repentina da subministración de gas en Iraq orixinou este mércores "un apagamento total" en todas as provincias do país, segundo un comunicado do Ministerio de Electricidade dese país, que desvincula a avaría da guerra na zona.

O Ministerio de Electricidade, que instou os medios e a cidadanía a que se "absteñan de especular e difundir rumores maliciosos", explicou que o corte de electricidade debeuse a un problema técnico causado por unha redución repentina da subministración de gas á central de Rumaila, en Basora.

Isto ocasionou a perda repentina de 1900 megawatts, un colapso de voltaxe na planta e a desconexión das liñas de transmisión de varias centrais xeradoras.

As autoridades iraquís informan de que se está traballando para restablecer a subministración gradualmente.

Os EUA instan os seus cidadáns a abandonar o país canto antes

Malia a negativa das autoridades iraquís a relacionar esta situación co conflito bélico, a embaixada dos Estados Unidos en Bagdad instou os seus cidadáns a abandonar Iraq canto antes, segundo un comunicado publicado o mércores.

"Ínstase encarecidamente aos cidadáns estadounidenses en Iraq a que abandonen o país tan pronto como poidan facelo de forma segura e a que busquen refuxio mentres tanto", declarou a embaixada. "Se poden saír do país de forma segura, deberían facelo agora", engadiu.