Aprobada a nova PAC, que prima as medidas medioambientais
Aprobada a nova PAC, que prima as medidas medioambientais
A nova PAC beneficia as pequenas e medianas explotacións, as maioritarias en Galicia
Os Gobernos repartirán polo menos o 10 % das axudas ás explotacións agrícolas máis pequenas
O Pleno do Parlamento Europeo aprobou este martes a reforma da Política Agrícola Común (PAC) para 2023-2027 e puxo fin, con este voto, a tres anos e medio de negociacións na Unión Europea (UE).
A Eurocámara ratificou o acordo alcanzado en xuño polas institucións da UE sobre a nova PAC, que primará máis as medidas ambientais dentro das axudas agrícolas e que vinculará as subvencións ao cumprimento dos dereitos laborais.
Ademais, outorga aos Gobernos máis responsabilidade sobre esta política, que aplicarán a través de plans estratéxicos nacionais.
A votación dividiuse en tres informes segundo as novas normativas da PAC, unha sobre financiamento das axudas -485 a favor, 142 en contra e 57 abstencións-, outra sobre regulación dos mercados agrícolas -487 a favor, 130 en contra e 71 abstencións- e outra sobre os plans estratéxicos nacionais -452 a favor, 178 en contra e 57 abstencións-.
Os europarlamentarios do Partido Popular Europeo (PPE), socialistas, liberais (entre eles Ciudadanos) apoiaron a reforma; o grupo da Esquerda (Unidas Podemos) e Os Verdes votaron en contra e Vox apoiou dous dos tres regulamentos, pero rexeitou o dos plans estratéxicos.
A reforma da PAC -que entrará en vigor en 2023- foi cualificada durante o seu debate como a máis ambiciosa nos últimos 30 anos e a segunda maior da historia da UE, en materia agrícola.
Afecta a dez millóns de empresas agrícolas da UE, a 695.000 beneficiarios españois e contará cun orzamento de 386.000 millóns de euros para o campo comunitario, 47.724 millóns para España.
A nova PAC introduce o chamados “eco-esquemas” ou pagos que supoñerán un 25 % das axudas directas, outorgados a prácticas beneficiosas para o medio ambiente. En canto aos plans nacionais, os Gobernos deberán remitilos á Comisión Europea antes do 31 de decembro.
Por primeira vez, a PAC inclúe unha “condicionalidade” social, o que significa que só as explotacións que respecten os dereitos laborais recibirán axudas agrícolas, o que empezará a aplicarse con carácter voluntario a partir de 2023 e obrigatorio desde 2025.
Os Gobernos repartirán polo menos o 10 % das axudas ás explotacións agrícolas máis pequenas e os países terán que explicar nos seus plans estratéxicos como planean facelo.
A nova PAC fixará un novo nivel mínimo obrigatorio de apoio aos novos agricultores, do 3 % dos orzamentos dos países para o apoio á renda.
Dentro dos plans de desenvolvemento rural -cofinanciados polos países para actividades distintas ou complementarias á agricultura- polo menos o 35 % das axudas serán para actuacións ambientais.
O acordo introduce unha nova reserva agrícola para financiar medidas de mercado en tempos de crises, cun orzamento anual de polo menos 450 millóns de euros.
