Aparece o corpo sen vida dun home de 72 anos aboiando no mar na Guarda
Semella que puido sufrir un esvarón ou unha indisposición mentres pescaba
Estaba preto da praia de Fedorento, na parroquia de Salcidos
Os servizos de emerxencia interviñeron no rescate dun home que apareceu aboiando no mar preto da praia de Fedorento, na parroquia de Salcidos, no concello da Guarda.
Malia os esforzos do helicóptero Pesca 1 e dos servizos sanitarios o home xa foi rescatado cadáver. Era un veciño de Tui de 72 anos que estaba pescando na zona e puido sufrir un esvarón ou unha indisposición.
Segundo informa o 112, tivo constancia deste suceso ao redor das 12:50 horas tras recibir a chamada dun particular que alertou da presenza do corpo dunha persoa aboiando na auga, a uns seis metros das rochas.
O centro de atención de emerxencias activou un operativo no que participaron Salvamento Marítimo, o Servizo de Gardacostas de Galicia, o GES, a Garda Civil e o 061.
Ao chegaren ao lugar dos feitos, os equipos recuperaron o corpo e iniciaron as manobras de reanimación. Con todo, malia os esforzos do persoal médico, nada se puido facer para salvarlle a vida.
Así mesmo, mobilizouse o helicóptero Pesca I ante a posibilidade de que a marea crecente dificultase o acceso á zona onde se realizaban os labores de asistencia.
.png)
