Aparece aboiando o corpo do bateeiro desaparecido en Cabo de Cruz
Un particular avisou ó 112 ao ver unha planadora amarrada a unha batea sen ninguén a bordo nin sobre a estrutura mexilloeira
O corpo foi trasladado ao porto de Cabo de Cruz
Un home apareceu aboiando esta noite en augas de Cabo de Cruz, en Boiro. Todo apunta a que se trata do bateeiro que se dera por desaparecido a última hora da tarde deste venres.
A voz de alarma deuna un particular que contactou co 112 avisando de que había unha planadora amarrada a unha batea fronte á praia de Carragueiros. Non había ninguén abordo nin se vía tampouco a ningunha persoa sobre a estrutura mexilloeira.
Iniciouse un dispositivo de busca no que Salvamento Marítimo activou unha embarcación e o Helimer 401. O112 tamén daba aviso ao Servizo de Gardacostas de Galicia, a Garda Civil e Policía Local. Ademais, cinco barcos bateeiros de Cabo de Cruz tamén participaron na busca. Sobre as 11 da noite, unha das embarcacións do dispositivo oficial conseguía atopar a vítima, que permanecía aboiando e xa sen vida nunha zona próxima á batea onde permanecía a planadora. O corpo do home foi trasladado ao peirao de Cabo de Cruz, e derivado ao Instituto de Medicina Legal de Galicia para practicarenlle a autopsia, e determinar as causas da morte.
