Galicia rexistra 42 mortos por afogamento no que vai de ano, oito máis ca en 2025

Con tanta calor todos queremos meter o corpo a remollo, pero sempre con precaución, xa que a auga pode ser unha trampa mortal para os que arriscan demasiado.

Galicia acumula 42 mortos en praias, piscinas e ríos este ano, en toda España van 308. Preocupa especialmente a repunta de vítimas infantís.

"Por iso non podemos sacarlles o ollo de enriba, en pouco tempo un neno afoga. Nun despiste pode caer boca abaixo, se non ten mobilidade nun palmo de auga pode morrer", explica Nuria Rodríguez, a presidenta da Federación de Salvamento e Socorrismo de Galicia.

Descoidos cos pequenos, indisposición entre os maiores ou imprudencias están detrás da maioría dos afogamentos. Unha bandeira vermella no mar é como un sinal de stop na estrada, pero algúns fan caso omiso.

"É un problema que temos desde hai moito tempo. Nós non somos autoridade, non podemos multar. Algúns adolescentes e tamén xente maior non nos fai nin caso".

Á falta de conciencia únese a dificultade para atopar socorristas en Galicia. A formación é moi esixente, pero a tempada de traballo moi curta. Así que desde a Federación piden ampliala.

"Hai que ampliar a tempada, que dure do un de xuño ao trinta de setembro. Cada vez hai máis ondas de calor, máis turistas e máis verán e precisamos máis profesionais durante máis tempo para que a eles tamén lles sexa atractivo o traballo".

O mellor consello é seguir as advertencias destes profesionais. E se non os hai, cómpre tirar de sentido común para que un refrescante baño non remate en traxedia.