Algúns medicamentos agravan os efectos da vaga de calor no corpo

Moitos medicamentos de uso común poden facer que levemos aínda peor os días de calor abafante. Un exemplo son os diuréticos, que favorecen a deshidratación cando máis agua precisamos. 

"Hai que beber moito e ser constantes na hidratación, aínda que non se teña sede. Tamén hai outros medicamentos como os antihistamínicos que interfiren na regulación da temperatura corporal, ou analxésicos como o Tramadol, que aumentan aínda máis a temperatura do corpo cando xa temos moita calor", explica Margarita Muñoz de la Llave, farmacéutica en Carballo.

Ademais, moito ollo se na caixa aparece un pictograma cunha nube e un sol dentro dun triángulo vermello, porque terán que protexer a pel máis ca nunca.

"Indica que son medicamentos asociados á fotosensibilidade. Se os tomamos e nos poñemos ao sol poden producir manchas ou alerxias. Por iso é fundamental botar fotoprotección e renovala varias veces ao día".

No verán tamén é fundamental ser coidadosos coa conservación. Calcúlase que uns 7.500 preparados perden eficacia ou seguridade coas altas temperaturas, especialmente os que non son pastillas.

"Supositorios, óvulos e cremas son moi sensibles. No caso das cremas poden separarse as fases, nese caso non serían aptas para o consumo".

Mención á parte teñen os fármacos que precisan frío. Moito ollo ao levalos de vacacións, sempre en neveira portátil. E en caso de dúbidas, ler ben o prospecto, un costume moi san que pouca xente practica.