Alcoa prevé concluír co rearranque da planta de aluminio de San Cibrao o 7 de abril

O comité de empresa de Alcoa San Cibrao, en Cervo (Lugo), informa de que a empresa lle trasladou que prevé concluír o 7 de abril o rearranque das cubas da planta de aluminio.

Nun comunicado, o comité indica que así se concretou nunha reunión informativa celebrada este mércores.

Esta data chegará con atraso respecto ao acordo de viabilidade asinado entre representantes da empresa e dos traballadores, que fixaba a reactivación do 100 % das cubas para outubro de 2025. Este proceso viuse interrompido polo apagamento ocorrido en toda España o 28 de abril de 2025.

O proceso de rearranque iniciouse a comezos de 2024, coa conexión á rede eléctrica das dúas primeiras cubas de electrolisis tras os acordos alcanzados entre Alcoa e traballadores.

Ademais, o comité tamén se refire á situación do equipo de traballadores encargado do rearranque, de forma que os días de exceso de xornada xerados este ano gozaranse inmediatamente despois do 7 de abril e, unha vez gozados os días, volverán ás súas quendas de orixe.

Ante a solicitude do comité de reincorporar aos operarios de Eléctrodos desprazados a Electrolise e así evitar despedimentos de traballadores temporais formados e avaliados positivamente, "recíbese a negativa como resposta".

Proceso de hibernación desde 2022

En realidade, completar o rearranque das cubas supón recuperar a actividade plena na planta de aluminio, despois de permanecer nun proceso de hibernación desde xaneiro de 2022, cando a multinacional alcanzou un acordo cos seus traballadores para parar a fábrica a cambio de manter o emprego e de investimentos millonarios para modernizar o complexo.

Dos investimentos pactados nese acordo, lembra o comité, aínda falta a máis importante, a que se corresponde coa construción do forno de cocción de ánodos, unha infraestrutura que a representación dos traballadores considera fundamental para garantir o futuro da fábrica.

O rearranque das 512 cubas coas que conta a planta de aluminio comezou en 2024 e, aínda que o compromiso inicial era que a fábrica estivese operativa ao 100% en outubro de 2025, o proceso viuse interrompido polo apagamento eléctrico que tivo lugar o 28 de abril dese mesmo ano.

Segundo a información transmitida pola empresa, o comité explicou que as 14 cubas que quedan por arrincar “son novas”.