Galicia activa este sábado o aviso por choiva e temporal costeiro

Varios puntos de Galicia estarán este sábado en aviso amarelo por choiva e por temporal costeiro, nunha xornada en que a comunidade estará na influencia de baixas presións, con moita inestabilidade.

Segundo recolle MeteoGalicia na súa páxina web, o noroeste da provincia da Coruña estará en alerta por temporal costeiro, ao esperarse vento do suroeste de forza sete. Así mesmo, o aviso amarelo por choiva activarase no litoral da provincia de Pontevedra e no suroeste e oeste da provincia da Coruña. Todo iso ao esperarse precipitacións puntualmente superiores aos 15 litros por metro cadrado nunha hora.

Durante a xornada do sábado as temperaturas non terán cambios significativos e o vento será do suroeste na primeira metade da xornada, moderados en xeral, fortes no litoral norte, cambiando a compoñente norte pola tarde.