Activada a alerta laranxa por temporal costeiro nos litorais da Coruña e Pontevedra
O 112 Galicia contabilizou máis de 80 incidencias por meteoroloxía adversa sendo Pontevedra a máis afectada con 32 incidencias
O fenómeno meteorolóxico adverso empezará na tarde do sábado no oeste da Coruña
A Xunta activou a alerta laranxa por temporal costeiro nos litorais da provincia da Coruña e Pontevedra. Segundo a Axencia Estatal de Meteoroloxía (Aemet), o fenómeno meteorolóxico adverso empezará na tarde do sábado no oeste da Coruña, para estenderse na madrugada do día 9 ao suroeste da costa coruñesa e ao litoral de Pontevedra por vento de forza oito e mar combinada con ondas de ata seis metros.
A Secretaría xeral para o Deporte suspende a actividade deportiva federada no mar en diversas áreas da Coruña e de Pontevedra por fenómeno costeiro. A limitación rexerá a partir das 16:00 horas no oeste e suroeste da Coruña, así como nas Rías Baixas e Miño, en Pontevedra.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Consulta o noso balance de incidencias por meteoroloxía adversa:
— 112 Galicia (@112Galicia) March 7, 2025
📍 Pontevedra: 32
📍 A Coruña: 27
📍 Lugo: 16
📍 Ourense: 6
🌳 Árbores e pólas nas estradas: 27
🚧 Outros obxectos nas estradas: 18
🛠️ Actuacións preventivas: 15
🔗➡️ https://t.co/hFHPLwfKk6 https://t.co/IoWhSLhsuH
Máis de 80 incidencias na comunidade
O 112 Galicia contabilizou máis de 80 incidencias por meteoroloxía adversa durante o día de hoxe. As tipoloxías máis repetidas foron a presenza de árbores ou pólas nas vías de circulación (27 casos), a caída doutros obxectos (18) e as actuacións dos servizos de emerxencia para previr rochas (15), como a retirada de elementos desprendidos das fachadas dos edificios ou do mobiliario urbano.
Por provincias, Pontevedra foi a máis afectada, con 32 incidencias, seguida da Coruña (27), Lugo (16) e Ourense (6).
Entre os concellos con máis incidencias destacan Lugo, Vigo e Vilagarcía, con catro casos cada un, mentres que Guitiriz, Poio, Pontevedra e Vilanova contabilizaron tres.
Sen danos persoais
Con todo, destácase o derrubamento dunha casa deshabitada en Vigo, pouco antes das seis da tarde. Un particular alertou ao 112 Galicia e confirmou que ninguén resultou ferido.
En Moaña, os bombeiros tiveron que asegurar o tellado dunha vivenda de dúas plantas situada no lugar de Abelendo. Ocorreu pouco despois das 18:30 horas.
Por outra banda, o persoal dunha nave localizada na rúa Víctor Pita, en Sobrán (Vilagarcía), alertou ao 112 Galicia de que o vento levantou as chapas do teito e que acabaran no mar.
Por último, a Policía Local de Noia informou ao Centro Integrado de Atención ás Emerxencias de que se rexistrara o que parecera un pequeno tornado.
Durante a fin de semana manterase activa unha alerta amarela por vento en terra, que afectará practicamente a todo o litoral da comunidade.
