O temporal de vento e chuvia obriga a pechar parques e suspender actividades ao aire libre
O litoral das provincias da Coruña e Pontevedra e a montaña de Lugo e Ourense están en aviso laranxa por fortes ventos
O interior das provincias da Coruña, Lugo, Pontevedra e parte da de Ourense estarán en aviso amarelo por precipitacións
Na Mariña os termómetros superan os 20 grados e marcan unhas máximas pouco habituais para ser novembro
Varias localidades galegas pecharon este martes os seus parques e suspenderon as actividades ao aire libre con motivo do temporal que afecta a Galicia, con fortes ventos e abundantes chuvias.
E é que a costa das provincias da Coruña e Pontevedra, así como a montaña de Lugo e de Ourense permanece este martes e mércores en aviso laranxa por fortes ventos, que poderán superar os 100 quilómetros por hora nalgunhas zonas.
04/11 19:06 AVISOS HOY Y MAÑANA | Galicia: costeros, lluvias y vientos. Nivel máximo de aviso: naranja.
— AEMET_Galicia (@AEMET_Galicia) November 4, 2025
Actualizaciones en https://t.co/nhkAcYuyem pic.twitter.com/TioMYFzq83
Ademais, a Costa da Morte e as Rías Baixas tamén terán activado o aviso laranxa por ondada.
Pola súa banda, o interior das provincias da Coruña, Lugo, Pontevedra e parte da de Ourense estarán en aviso amarelo por precipitacións.
Con este prognóstico foron diversos os concellos galegos que adoptaron medidas, así o Concello de Vigo informou de que a partir das 19,00 horas deste martes pechou os parques do Castro, Castrelos, A Riouxa, Samil, Praza de Compostela e A Guía ata as 8,00 horas do mércores.
Nesta liña, o Concello de Santiago informou a través das súas redes sociais que debido ás condicións meteorolóxicas permanecen pechados os parques da cidade e a Escola Municipal de Música. Ademais, suspendeu as actividades ao aire libre.
Pola súa banda, o Concello de Ferrol suspendeu ata as 11,00 horas do mércores as actividades no mar e recomendou aos veciños permanecer lonxe das praias, paseos marítimos, portos e outros lugares afectados polo temporal.
O Concello da Coruña sinalou que, como medida preventiva, procedía ao peche dos accesos ás praias, parques e áreas infantís da cidade.
Na Mariña os termómetros superan os 20 grados e marcan unhas máximas pouco habituais para ser novembro
Mentres case toda Galicia ten activos varios avisos de vento e chuvia, na Mariña libran. Esquivan o temporal pero ademais fanno con boas temperaturas, grazas ao vento do sur. Aínda así son valores elevados para estarmos xa no mes de novembro.
A temperatura máxima marcouna este martes Ribadeo ao superar os 24 graos. Non foi unha marca illada, en varias localidades da Mariña os termómetros pasaron dos 20 graos.
.png)
