A Xunta declara a alerta por seca nas bacías do Lérez e do Anllóns e en Baiona

A Xunta de Galicia estableceu este martes o nivel de alerta por seca no sistema do río Lérez e no do río Anllóns e costa da Coruña como consecuencia da escaseza acumulada de precipitacións e a diminución progresiva dos caudais destes cursos fluviais.

Foi a principal decisión adoptada esta mañá con motivo da reunión da oficina técnica da seca, que integra a responsables do organismo hidráulico Augas de Galicia, membros das Consellerías de Sanidade e do Medio Rural, así como representantes de Protección Civil e MeteoGalicia.

Nun comunicado, o Goberno galego indica que se adopta esta medida, que supón activar o segundo nivel máis alto de restricións, só por detrás do de emerxencia, polo "descenso importante e continuado" que experimentou o caudal destes ríos desde a primavera e ante a previsión de que non vaia cambiar esta tendencia tras máis dun mes en prealerta.

Na práctica, esta decisión supón que se prohiben os usos "prescindibles" de auga, como encher as piscinas ou regar xardíns, e que se abre a posibilidade a cortes puntuais na subministración no caso de que sexan necesarios.

Tamén Baiona

Estas medidas pasarán a estar tamén vixentes en Baiona, pertencente á unidade territorial do río Verdugo, que permanece en seguimento e para a que non se declarou aínda o nivel de alerta.

As restricións sobre o sistema do Lérez afectan a múltiples concellos da provincia de Pontevedra (Barro, Bueu, Campo Lameiro, Cangas de Morrazo, Cerdedo Cotobade, A Estrada, Forcarei, A Lama, Marín, Meaño, Meis, Moaña, Moraña, Poio, Ponte Caldelas, Pontevedra, Sanxenxo, Silleda e Vilaboa), ademais do municipio ourensán de Beariz.

Pola súa banda, a alerta sobre o Anllóns limítase á provincia da Coruña e aos seguintes termos territoriais: Arteixo, Cabana de Bergantiños, Carballo, Cerceda, Coristanco, Culleredo, A Laracha, Malpica de Bergantiños, Tordoia e Zas.

Catro bacías máis en prealerta

Así mesmo, a Administración autonómica estableceu tamén o nivel de prealerta por escaseza moderada noutras catro unidades territoriais: o sistema fluvial do río Tambre e ría de Muros, o río Grande, o río Mendo e a ría de Betanzos e, para rematar, os ríos Landro e Ouro.

Varias destas concas presentan unha importante diminución de caudal nas últimas semanas, que no caso do río Grande supera o cincuenta por cento no pasado mes de xullo.

A situación de prealerta, explican desde a Xunta, implica un "seguimento intensivo da situación meteorolóxica e dos niveis dos ríos e encoros nos sistemas afectados" para monitorizar posibles incidencias.

Ademais, engaden, promoveranse medidas de concienciación dirixidas á cidadanía para un uso "responsable" da auga e recoméndase minimizar "os gastos públicos non esenciais", con obrigación para as entidades municipais afectadas de comunicar diariamente a Augas de Galicia os datos de caudais de consumo.

En total, son noventa e un os concellos en Galicia con restricións en vigor ou medidas de seguimento activas: trinta e dous en alerta e cincuenta e nove en prealerta.

Pontevedra activa sancións e Vigo carga contra a Xunta

A xunta de goberno municipal de Pontevedra reuniuse esta mesma mañá de forma extraordinaria para tomar medidas tras a declaración de alerta e emitiu un bando con novas prohibicións e sancións en caso de incumprimentos.

A tenenta de alcalde, Eva Vilaverde, explicou que trata de reducir ao máximo o consumo municipal de auga, pero puntualizou que, de momento, a cidade pode abastecerse con bombeo directo do Lérez e sen recorrer ao encoro do Pontillón, o que confire "certa marxe" de seguridade para a subministración.

Preguntada polo consumo de auga da industria de pasta de celulosa do grupo Ence, situada na ría de Pontevedra, Vilaverde respondeu que "constata unha melloría no caudal cando a factoría cesa as súas captacións", como ocorre na actualidade.

Con todo, lamentou "a falta de medidores precisos río arriba que permitan coñecer de forma exacta" o volume captado en cada momento.

Pola súa banda, o alcalde de Vigo, Abel Caballero, cargou contra a Xunta con motivo da xestión dos recursos hídricos e indicou que o encoro de Eiras atravesa "a peor situación histórica de reserva de auga".

Caballero afirmou que se hai subministración "para catro meses e medio" é grazas á planta potabilizadora que "pagou integramente o Concello" e puxo unha especial énfase na "gravidade da situación", aínda que en 2017 houbo unha "peor situación".

Normalidade no resto da demarcación

No entanto, o Goberno galego quixo remarcar que no resto da demarcación hidrográfica Galicia-Costa a situación é de "normalidade".

Así pois, apuntou que o nivel de abastecemento dos encoros sitúase a comezos de agosto no 72,7 %, un 14,4 % menos que o ano pasado nestas datas.

No día de onte presentouse o informe mensual elaborado por Meteogalicia, que recolle que o pasado xullo foi o máis cálido desde que existen rexistros e que as precipitacións acumuladas foron uns 86 % inferiores ás da media da serie histórica.