A Xunta declara a alerta amarela por calor este sábado no interior de Pontevedra
En total, son 16 os municipios afectados
A calor alongarase polo menos ata o mércores da semana vindeira
Unha muller nunha fonte pública da Caniza, un dos concellos en alerta amarela este sábado. Adrián Irago/Europa Press (Arquivo)
A Xunta declarou a alerta amarela por episodio de calor, o terceiro nivel de gravidade, en dezaseis municipios do interior de Pontevedra para este sábado.
Os municipios afectados son Agolada, O Campo Lameiro, A Caniza, Cerdedo Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces, indicou a Consellería de Sanidade nunha nota.
Aire cálido desde o sur polo menos ata o mércores
As previsións de Meteogalicia indican que, a partir do sábado as altas presións localizaranse ao norte da Península Ibérica, onde quedarán situadas ata polo menos o mércores.
Desde esa posición, impedirán que cheguen influencias atlánticas e atraerán aire cálido desde o sur, o que deixará ceos despexados, vento en calma e temperaturas elevadas nos próximos días.
#Alertas112 ☀️🌡️ A partir de mañá un novo aviso por vaga de calor de nivel amarelo. 🟡 Para o interior de Pontevedra. 🔗 https://t.co/TCgH5yLFGs https://t.co/wnxx3SJHfb
— 112 Galicia (@112Galicia) September 18, 2026
Grupos de risco: maiores de 65 anos e menores de 4
Os principais grupos de risco son os maiores de 65 anos e menores de catro anos, especialmente menores dun ano; persoas con patoloxías como enfermidade cardiovascular, diabetes ou insuficiencia renal; medicados con fármacos como diuréticos; maiores que viven sós e persoas en risco; persoas con exceso de peso ou peso excesivamente baixo, e quen pasa varias horas en exteriores.
A Xunta emitiu varias recomendacións, tales como beber máis líquidos sen esperar a ter sede, evitar comidas copiosas e bebidas quentes ou alcohólicas, usar roupa fresca e protector solar, e permanecer en espazos ventilados e á sombra.
