A Xunta ve "inaudito" que a sectorial de Educación non aborde o informe PISA

 O conselleiro de Educación, considerou "inaudito" que a conferencia sectorial de Educación convocada para este venres non aborde cun punto específico os resultados obtidos por España na última edición do informe PISA, que constatan un importante retroceso en comprensión lectora e outros apartados.

"Iso manifesta o interese que o Ministerio lle dá á calidade educativa", dixo Rodríguez en declaracións aos medios previas a participar neste encontro das comunidades autónomas co Executivo estatal, nas que opinou que o Goberno pretende "escorrer o vulto" ante o acontecido.

Europa Press

O conselleiro dedicou a súa intervención para cargar contra a política educativa do Goberno central, á que responsabilizou dos resultados do informe PISA, e, entre outros puntos, esixiu que se revise a modificación de currículos impulsada desde esta administración.

"Teñen pouco sentido e, dalgún modo, poñen en segundo termo o coñecemento", afirmou sobre eles, antes de engadir que van "en contra do que é a cultura do esforzo" e afear que tampouco se implementase un novo sistema de función docente.

Para Rodríguez, todo isto é mostra de que o Goberno central está "en absoluta descomposición" e que o seu obxectivo agora é "poñer chinesas" no camiño de quen o sucederá dificultando a súa futura xestión con decisións como a lei de cocientes.

Deste xeito, tachou de "chapuza xurídico-administrativa" unha norma que, remarcou, conta co rexeitamento dalgúns socios do Executivo e que, ante un previsible fracaso na súa tramitación parlamentaria, o Goberno trata de impulsar "pola porta de atrás" mediante a modificación dun real decreto.