A vaga de calor deixa en España 360 mortes atribuíbles ás temperaturas extremas
Este sábado déixanos máximas de ata 44 graos, principalmente no val do Ebro e no suroeste peninsular
O domingo o aviso vermello por temperaturas máximas concentrarase en Aragón, Navarra e A Rioxa
A calor dará unha tregua o luns, pero, segundo as previsións, a partir do mércores as temperaturas volverán ascender
O Ministerio de Sanidade estima en 360 as mortes atribuibles ás altas temperaturas rexistradas nos seis primeiros días da vaga de calor que afecta a gran parte da península. A xornada con máis falecementos a deste venres día 15, con 123 por esta causa.
Este sábado déixanos máximas de ata 44 graos, principalmente no val do Ebro e no suroeste peninsular.
Son moitos días con temperaturas extremadamente altas en case toda a península. A vaga de calor dificulta a actividade polo día e o descanso polas noites e cada un lévao como mellor pode...
"Co abano e erguéndome pola noite corente veces, é horroroso" "Isto é agotador e por riba no meu estado a 15 días de dar a luz lévoo como se pode, con moita auga, refrescándose, aire acondicionado e moita paciencia", din algúns transeúntes.
A vaga de calor que desde o día 10 se extende por todo o país, excepto Canarias, deixa este sábado máximas de ata 44 graos, principalmente no interior peninsular, no val do Ebro e no suroeste da península. Sanidade estima en 360 os falecementos que se poden atribuir ás altas temperaturas desta semana.
O domingo o aviso vermello por temperaturas máximas concentrarase en Aragón, Navarra e A Rioxa, con valores que alcanzarán ou superarán os 43 graos, nunha xornada na que 15 comunidades autónomas estarán en risco laranxa ou amarelo por altas temperaturas.
O luns a calor dará unha tregua pero segundo as previsións a partir do mércores as temperaturas volverán ascender, principalmente no suroeste peninsular.
