A última tenda de discos de Ourense fai comunidade na cidade
Na era dixital, do auto-tune e a música en streaming, as tendas de vinilos resístense a desaparecer
E conquistan público cada vez máis novo, sorprendido ao descubrir a calidez do son nun tocadiscos
"O vinilo ten unha calidade e unha calidez insuperable. Aparte de que a edición tamén é precioso, con portada dobre, fotografías grandes...", asegura Alfredo Varela, o dono de Bonus Trac, a última tenda de discos de Ourense.
A paixón pola música é o que levou a Alfredo a deixar o seu traballo de toda a vida para aventurarse no que realmente lle gustaba.
"Para min, de feito, é o meu traballo pero non o considero tal. Veño aquí contento. Para min é igual un venres que un luns e un domingo", explica.
Desde aquí, a única tenda de vinilos que queda en Ourense, Alfredo fai comunidade.
"É unha tenda de música, de intercambio de coñecementos, uns anunciámoslles a outros as novidades que coñecemos...", comenta Alfredo.
Pero tamén hai moito público novo, que non renuncia ao streaming pero que valora o son e o ambiente que aportan os vinilos. "Hai máis atmósfera. Ti estás escoitando e formas parte do que estás escoitando", di Alba, que pasa pola tenda a miúdo.
Algúns, nin sequera teñen tocadiscos, pero van empezando a colección para cando chegue o momento. "Non teño tocadiscos, íbao pedir para o aniversario. Encántame ver os discos e descubro cancións ou grupos e encántame coleccionalos", di outra Alba, afeccionada tamén aos vinilos.
Michael Jackson, resucitado no último biopic, é agora mesmo o máis demandado, incluso por clientas insospeitadas. "Os cantantes de agora usan auto-tune, pero cando cantaba Michael Jackson non existía e cantaba coa súa voz. Iso é algo que leva por el", explica Mencía, de dez anos.
Bonus Track acaba de cumprir o seu cuarto aniversario e Alfredo reafírmase na decisión. Aquí, di, a vida vai a outro ritmo, o que marcan as agullas sobre o vinilo.
