Emotivo reencontro no balneario histórico de Cortegada

"Morriña. Morriña. Pero alá tamén estou ben".

Pepe é o maior e tamén quen fixo máis quilómetros. Veu desde Guatemala para reunirse cos seus irmáns en Cortegada.

"Estiven en Italia, en Vietnam, en Colombia, Centroamérica e terminei en Guatemala por dous anos e xa levo sesenta".

Amparo, que vive en Lleida, tamén viaxou. No espazo e no tempo, aos recordos da infancia que pasaron aquí.

"Xogabamos a saltar á corda, a escondernos...". "Reencontrarse e estar xuntos. Falar dos tempos de antes, dos nosos pais, que non foron ricos pero déronnos todo o que puideron".

Soledad e Ramón, o máis novo dos irmáns, estiveron nos Estados Unidos, en Nova Jersey, pero apenas poden contalo coa emoción.

"Para min é unha emoción enorme estar aquí celebrando todo isto".

Un día inolvidable que pasaron na compaña dos que veñen detrás. Fillas, xenros e netas, orgullosas tamén das raíces familiares e, sobre todo, dos seus avós. "Viñemos celebrar o aniversario do meu avó". "É moi gracioso, ocurrente... unha persoa marabillosa, a verdade", din as dúas netiñas de Pepe, que viñeron canda el desde Guatemala.

Emocións a flor de pel e unha boa cifra para festexar.