A Unión Europea ábrese a negociar o veto ao arrastre en todas as zonas protexidas

O comisario de Pesca abre lixeiramente a man antes as fortes críticas ao seu plan. Virginius Sinkevicius di que non aplicará unha prohibición unilateral a toda as artes de fondo no 30% das augas europeas.

E acepta abrir un diálogo co sector ao tempo que lles pide novos esforzos para ser sostibles, por exemplo substituíndo os motores diésel.

O Plan de Acción da Comisión Europea para Protexer os Océanos segue adiante. España e varios socios estudan denuncialo porque non respectaría a soberanía dos países.

O debate dentro do Consello de Agricultura e Pesca foi moi vívido este luns. Francia cualificouno como nefasto ao condenar a pesca artesanal.

O ministro de Pesca Luis Planas dubida do futuro para o sector e citou a perda de 6.000 barcos na última década.

"Non ten en conta o referente, a necesidade da rendibilidade económica e das consecuencias sociais das decisións"

Era a primeira vez que os ministros europeos de Pesca debatían o controvertido paquete pesqueiro da Comisión Europea.

E España non quedou soa nas críticas ao proxecto do comisario Sinkevicius para 2030. É un plan, dixo o ministro Planas, desenfocado e desequilibrado.

"Desenfocado porque non responde á pregunta principal, é dicir, como conseguimos abastecemento alimentario. E desequilibrado porque ten en conta a unha formulación fundamental que é a restauración dos topes biolóxicos, pero non ten en conta o referente, a necesidade da rendibilidade económica e das consecuencias sociais das decisións",  aseguraba Planas.

"Non se trata de demonizar a pesca de arrastre. A pesca de arrastre é unha modalidade"

Moi cuestionado no Consello Europeo de Pesca foi un dos puntos do plan máis prexudicial para Galicia.

Non está xustificado, defendeu España, pero tamén Portugal, Francia ou Alemaña entre outros países, o veto á pesca de arrastre en todas as zonas protexidas.

"Non estamos de acordo. Non se trata de demonizar a pesca de arrastre. A pesca de arrastre é unha modalidade. E hai un dato fundamental que é que onde se aplica á pesca de arrastre prodúcese perfectamente o rendemento básico sostible e a recuperación dos topes pesqueiros", dixo o ministro español.

"Non hai nin un só dato científico que abale as propostas que este comisario está poñendo enriba da mesa"

A conselleira do Mar coincide en que non hai xustificación científica para eliminar a pesca de arrastre de fondo sen excepcións.

"Non se pode dicir como defensa do medio ambiente se adopta un plan de acción e por detrás dese plan non hai nin un só dato científico que abale as propostas que este comisario está poñendo enriba da mesa", reiterou  Rosa Quintana.

España tamén defende axudas para a frota que traballa en Marrocos no caso de que teñan que paralizar a actividade antes de renovar o convenio. Está pendente de sentenza por incluír augas saharauís.

Planas considera difícil avanzar na negociación con Rabat mentres non se pronuncie o Tribunal Europeo de Xustiza.