As confrarías galegas esixen que se dupliquen as bonificacións ao combustible ou manterán as protestas

A Federación Galega de Confrarías esixe que a bonificación ao combustible pase dos 20 céntimos de euro actuais ata os 40, do contrario, as mobilizacións seguen enriba da mesa.

Ademáis critican o modelo de distribución do Ministerio de Agricultura e Pesca, que asigna as compensacións por artes de pesca e tamaño do buque, en lugar de basearse non consumo real de diésel das embarcacións. 

A organización acordou nunha reunión, celebrada na tarde deste luns en Ames, levar a súa proposta a Madrid o martes vindeiro para buscar o apoio do sector a nivel nacional.

A subida do combustible "afoga" a pesca artesanal

As confrarías suxiren limitar en 0,70 euros por litro o prezo do carburante, que ameaza con paralizar a frota e advirten, nun comunicado, de que a "alarmante subida" do prezo do combustible "afoga" á pesca artesanal.

Sosteñen que a frota pesqueira non pode repercutir os custos directamente no consumidor, posto que a comercialización se realiza a través das lonxas, así que as empresas armadoras non poden controlar as marxes de beneficio e por iso trabállase baixo un réxime subvencionado de combustible.

Aseguran que agora, con prezos que superaron o euro por litro, os custos "fan totalmente inviable a actividade e levan á paralización da frota e ao abandono da profesión".

A Federación Galega de Confrarías decidiu participar na Comisión Permanente da Federación Nacional de Confrarías o próximo día 29 e buscar o consenso nacional para "tomar medidas drásticas" de xeito conxunto.

Tras esa cita, convocarán unha segunda reunión de patróns maiores para comunicar as medidas conxuntas e as actuacións previstas.