A seca bota a perder boa parte da colleita de millo
Na bisbarra de Ferrolterra estiman que perderán polo menos o 30 % da produción por mor da seca prolongada
Alertan da repercusión negativa que terá para o sector gandeiro pola falta de forraxe e o encarecemento dos custos
Xose Antón observa con resignación unha das suas plantacións de millo en Narón. Sementou unhas 55 hectáreas. A falta dun mes para o ensilado, o millo non ten a envergadura que debería, a espiga precisaría auga e non hai previsión de chuvia, polo que estima que se bote a perder boa parte da colleita. Calcula que entre un 20 e un 50 por cento no peor dos casos.
Os prezos dos insumos, o verme soldado e especialmente a seca están detrás da que os agricultores cualifican xa como pésima campaña.
En Mugardos, Domingo xa da por perdida case toda a colleita, polo mesmo motivo, a seca prolongada xa desde o mes de maio.
Os agricultores alertan da repercusión que isto vai ter no sector gandeiro, pola falta de forraxe e o encarecemento de prezos, porque a seca é xeneralizada, xa que non lle afecta só a Galicia.
