A ría de Vigo é un das zonas con maior presenza de cabaliños de mar en todo o litoral español
Un grupo de científicos do Instituto de Investigacións Mariñas de Vigo vai concluír este ano o estudo máis amplo feito ata o momento en España sobre os cabaliños de mar
Pretenden crear un mapa de distribución da especie en todo o litoral español, e establecer zonas de especial protección.
O proxecto HippoDEC é un encargo do Ministerio para a Transición Ecolóxica
Ata hai uns anos sabíase pouco dos cabaliños de mar. Habitan en zonas con fondos cubertos por praderías mariñas. Forman colonias moi reducidas, de apenas un ou dous exemplares.
O proxecto HippoDEC, do Instituto de Investigacións Mariñas de Vigo, avalía as poboacións desta especie en todo o litoral español. Galicia é unha das zonas nas que ten maior presenza, sobre todo a ría de Vigo.
"Practicamente non coñeciamos nada. Desde hai dous anos e medio, xa que o proxecto dura tres anos e estamos no último ano, conseguimos triplicar o número de observacións en todo o litoral español. Na ría de Vigo temos a que seguramente sexa a poboación máis grande de todo o litoral español", asegura Miquel Planas, investigador do Instituto de Investigacións Mariñas de Vigo-CSIC.
O proxecto é posible grazas aos "Observadores do Mar", unha rede de 200 mergulladores que toman rexistro dos avistamentos. Xa se fixeron mil observacións.
Un dos obxectivos deste grupo de investigadores é aumentar a protección dos cabaliños de mar, que xa están incluídos na lista de especies silvestres de protección especial
"O noso interese está en que se inclúa noutro catálogo de maior protección, que é o Catálogo Nacional de Especies ameazadas. O Hippocampus guttulatus xa está en vías de ser incluída, porque se valorou positivamente a nosa solicitude, e agora o noso interese é poder incluír as outras especies que temos no noso litoral", explica o investigador do CSIC Miquel Planas.
A investigación desenvólvea o mesmo grupo do Instituto de Investigacións Mariñas de Vigo que no ano 2007 conseguiu reproducir por primeira vez en catividade o cabaliño de mar.
