O concurso de tapas, aperitivo da Festa da anguía de Valga e a mostra de augardente do país
É unha posta en valor da anguía do Ulla
Á noite entréganse os premios do concurso de tapas
Oito locais de hostalería participan nesta edición do concurso degustación de tapas de anguía de Valga. Cada un cunha preparación distinta: en guiso, en arroz, en empanada ou en croquetas. É un peixe caro porque escasea, así que este é bo momento para probar.
"Son de balde porque o Concello colabora entregándonos a anguía e nós poñemos a elaboración. É un método para que a xente se mova por todos os locais que participan", di Luís Valiño, dono do bar O Pontellón.
Luís gañou os dous últimos anos e di que sempre trata de innovar. O mesmo lle pasa a Marcelo, un arxentino de pais galegos que se tivo que afacer a este peixe e a súas laboriosas preparacións.
"Nunca a probara pero desde que cheguei aquí e empecei a participar na tapa non tiven máis remedio que probala porque teño que explicarlle á xente o que lle estou dando e non está mal, está bastante boa", conta Marcelo Solla, da pastelería Caprichos.
O aspecto da anguía desagrádalle a moita xente. O obxectivo da festa é promocionar este peixe que se captura preto, no río Ulla. Os actos principais da festa da anguía e da mostra de augardente do país terán lugar pola tarde e á noitiña entregaranse os premios do concurso de tapas.
