A Policía Local de Moaña retira unha decena de cabalos da estrada
Os cabalos estaban nunha rotonda preto dun dos accesos da autovía do Morrazo ao concello de Moaña
Non é a primeira vez que estes animais invaden as estradas do municipio
Non foi doado dirixir os cabalos desde a estrada ata unha pista forestal. Á chegada dos axentes, os cabalos estaban nunha rotonda moi preto dun dos accesos de saída da autovía do Morrazo ao concello de Moaña.
Algúns dos cabalos camiñaban cara a un dos carrís de saída e outros polo medio da estrada. Nesta ocasión a Policía Local empregou o seu vehículo coas sirenas para conducilos na dirección adecuada.
A problemática dos cabalos que baixan do monte ás estradas non é nova no concello. Segundo os voluntarios de Protección Civil, esta situación é cada vez máis frecuente.
O gando é criado por veciños da zona que nalgúns casos manteñen cos seus correspondentes chips e certo control, pero noutros casos os cabalos carecen de identificadores, o que impide localizar os seus donos e facerse responsables.
